سامحيني
باسم الكربلائي
قصيدة : سامحيني
الشاعر : السيد عبدالخالق المحنة
الرادود : الحاج ملا باسم الكربلائی
المناسبة : ليلة 7 محرم - 1436 هـ
موقف ايهد الرواسي مر عليه
حيرتي من فوق مهري ابلا ايديه
مدري أطيح اعله الوجه مدري اعله ظهري
و آنه كل هذا و افكر شنهو عذري
سامحيني...سامحيني
******
خويه من قطعوا يميني عاتبتها
ظلت املزمه ابقميصي سامحتها
من أخذت السيف منها ووقعتها
و إنزلت من نهري مسرع قابلتها
ها يا إيدي بيج زينب صافحتها
بيج أنا دقيت صدري من جبتها
جن تقلي اوداعة الله امشي قاتل
بالعطاشه هالله الله يا بو فاضل
و احملت سيفي بيساري دمي يجري
و آنا كل هذا و افكر شنهو عذري
سامحيني ...سامحيني
******
قمت أشوف الجيش غيمه يمي يقرب
حاصروني و آنه ضامي قلبي يلهب
ابهالوضع و آنا ذكرتج خويه زينب
اتذكرت مره سألتي و جنه نلعب
قلتي لو واحد ضربني خويه تغضب
و بوكتها ازعلت منج و الدمع صب
اتذكرت هسه سؤالج يالحبيبه
أسود ايخلون متنج يالغريبه
لو طفت نار الخيم شيطفي جمري
و آنا كل هذا و افكر شنهو عذري
سامحيني ...سامحيني
******
يختي من طاحت يساري استضعفوني
سدوا اعليه طريقي حيّروني
اسهام و ارماح و بواتر قطعّوني
نمت فوق الجود و أبجي شاهدوني
قالوا اعليمن دموعك ناشدوني
من قلت أبجي اعله زينب عذّبوني
صوبوا جودي و تبده و باوعت لج
و آنا بس بعين وحده اتعذرت لج
عاينت وشجم سهم نام اعله صدري
و آنا كل هذا و افكر شنهو عذري
سامحيني ...سامحيني
******
أشعر بفارس إجاني و هذا حالي
قلي انت اتقول آنا الما أبالي
يالله أدعوك النزالي و القتالي
قلت له لا يمناي عندي و لا شمالي
قلي شنهو الغالي عندك رد سؤالي
قلت له خدر الفاطميه اهوايه غالي
قلي ما يسلم خدرها بنت أبوها
بوقعتك نكسر ظهرها و ظهر أخوها
و ابتسم لمن تحشمك خويه خدري
و آنا كل هذا و افكر شنهو عذري
سامحيني ...سامحيني
******
بالعمد لمن ضربني راسي انطر
يختي جن القاع قامت بيه تفتر
اهنا صحت يحسين خويه احضر احضر
راح أروح و الك الله يا بو الأكبر
وقعتي خويه اعله وجهي اتألم أكثر
ابعيني سهم العين أسمعه من تكسر
يا مهر خبّر عضيدي و ابجي حرقه
قبل لا ينقص وريدي أرد أشبقه
آخر أنفاسي يضع ثغره اعله ثغري
و آنا كل هذا و افكر شنهو عذري
سامحيني ...سامحيني
******
بن سعد بالجيش ناده آنا أسمعه
هسه ظل حسين وحده خل نقطعه
حاولت أنهض و أقلهم بيَّ فزعه
بس يزينب هيه قومه و هيه وقعه
ابلايه شوف و لا ايديه بيش أنفعه
يا الهي رد لي سيفي شوفي رجعه
ها يملج الموت سارع بالمنيه
خاف أشوف حسين واقع عالوطيه
خويه زينب من يطيح حسين احذري
و آنا كل هذا و افكر شنهو عذري
سامحيني ...سامحيني
******
حسين ناداني يخويه وينك انته
و اركضت لاجن يزينب من وصلته
الشمر جاثي اعله صدره بعيني شفته
قلت له يا ملعون أذبحك لو لمسته
خويه جنه ما سمعني و حز رقبته
و أشعر اتجاهلت ضربتي من ضربته
خويه ثاري آنه ميت من إجيته
و المهم بسته بوريده و بلحيته
ميت و بأمرج بقه مشغول فكري
و آنا كل هذا و افكر شنهو عذري
سامحيني ...سامحيني
******
نار المخيم شفتها و شفتج انتي
و آنه جيت أركض و أنادي و ما سمعتي
خايف الوادم تشوفج لو طلعتي
من قرب لج الشمر قلت له اترك اختي
شفت امن السوط طحتي بس وقفتي
و الشمر من شتّم أمج انهضمتي
يذبح اعتابج يخويه وداعة أمج
آنه جسمي اعله الشريعه روحي يمج
و الله يا خويه الدموعج أفدي عمري
و آنا كل هذا و افكر شنهو عذري
سامحيني ...سامحيني
******
الشمر من صاح بسمج انتي جيتي
باوعي السيفي يقلج يا سبيتي
هذا دم حسين هذا ما دريتي
شفتج اتقبلين سيفه و انحنيتي
هوه قصده يشوف دمعج ما رضيتي
عفيه أختي درتي وجهج من بجيتي
قطّع السوط اعله متنج و آنه أنحب
ابلا جلد متنج لقيته آه يزينب
متنج اشسوه ابدليلي الله يدري
و آنا كل هذا و افكر شنهو عذري
سامحيني ...سامحيني
المرسل:
الأحد, 31 كانون2/يناير 2021
2015-11-13 09:23:52
