عاشق

قصيدة : عاشق  وقلبي  الحنين  الليلة  ذايب

الرادود : الحاج ملا باسم الكربلائی

الشاعر : علي الخفاجي

عاشق  وقلبي  الحنين  الليلة  ذايب
روحي  مشتاقة لصوركم يل الحبايب
*****
وين   مااكتب  مشاعر  القه  صوره
(للعراق)  الينبض  احساس بشعوره
تغفه  باحضانه  النوارس  من  تزوره
موطن    الاحرار   والناس   الغيوره
من  عشق هذا الوطن ما قول تايب
روحي  مشتاقه لصوركم يل الحبايب
*****
(للنجف)  مشتاقة  روحي  وللزياره
ماتلمني   القاع   لو  شفت  المناره
يبقه  (حيدر)  بلسم قلوب الحياره
واستراحوا    آدم    ونوح    بجواره
اضرحتهم  فاقت  السبعه العجايب
روحي  مشتاقه لصوركم يل الحبايب
*****
قبه  (حسين)  الذهب واسع مداها
ناشر    جناحاته   جبريل   بسماها
تستحي النجمات لو شافت ضواها
من    بعيد    قلوبنا   تحن   لثراها
بيها   دمعة  زينب  تخّضر  مصايب
روحي  مشتاقة لصوركم يل الحبايب
*****
نعم  آيه  من الوفه( العباس) اشوفه
جعفر    الطيار   يستقبل   اضيوفه
والفرات    الفايض   بغيرة   جفوفه
عالقبر   يندار   كل   يوم  ويطوفه
ريت   اويه  النهر  اوصل  للاطايب
روحي  مشتاقة لصوركم يل الحبايب
*****
كون   اهيم  وتنطوي  الوديان  اليه
و(للجوادين)   اعتني  بهاي  المسيه
لاتلوموني    بعشق    اهل   الحميه
روحي   مشتاقة  تزور  (الكاظميه)
علمتني  الدنيا  من  اشتاق  اعاتب
روحي  مشتاقة لصوركم يل الحبايب
*****
قصة  (الكاظم)  تظل قصة عجيبه
أنبياء    مامرت    بهيجي   مصيبه
يوسف  انفك  سجنه وتلاكه بحبيبه
(موسه) حتى اجنازته انشالت غريبه
دمعة    المسجون   تعثر   بالنوايب
روحي  مشتاقه لصوركم يل الحبايب
*****
روحي نجمة ليل واشتاقت للاحباب
شايل  السامره  لهفه  ودمعة اعتاب
والنسايم   من   تمر   وتحرك  الباب
تلجم جروح القلب واتهيج الصواب
من اطب (حضرتهم) اتروح المتاعب
روحي  مشتاقة لصوركم يل الحبايب