قصيدة : مملكة دمعتي
الشاعر : الأستاذ ايهاب المالكي

الرادود : الحاج ملا باسم الكربلائی
في حسينية المرحوم الحاج داود العاشور

 

عاهدت حسرتي... ونتي و عبرتي
إنت تبقه يحسين... مملكة دمعتي
عهد العشق... ما نفترق... قلبي اليدق سمعته
ليلي إرتوه ... منك ضوه ... بيك الهوه عرفته
مملكة دمعتي

******

فلسفة تكوينك من الما ممكن إيكون
روحي إذا ما ضمتك ما بيها مضمون
أقدر أشوفك حته لو ما أملك إعيون
جنني حبك و أعترف و أتباهه مجنون
حررت قيودي... يا سبب وجودي
آنا شوقي وياك ... بيه نلت خلودي
هيهات أمِل... من أنشغل ... بيك العقل شغلته

******

حافظ حروف إسمك مثلما أحفظ السر
الما حبك إمن إيضوق عمره بيه طعم مر
يالنور وجهك كون الياقوت و الدر
إحساسك يخلي الحجر بالشوق يشعر
ينولد خيالي... من تجي إعله بالي
و آنا جسدت بيك... عالمي المثالي
معنه الشرف... بيك إنعرف... قلبي إعترف عشقته

******

علمني نحرك عالمحبه و الأمانه
علمني وقفت الوفه إبوجه الخيانه
يحسين و الهذا السبب حبيتك آنه
إنت اليحبك تمتلك روحه و كيانه
تمتلك حياتي... يا أمل نجاتي
حته ألتقي إوياك... أنتظر مماتي
مل الصبر ... و آنه أنتظر... بيدي العمر حسبته

******

بالحجر موسه إتفجرت له إثنا عشر عين
و إنت بجتلك كل عيون الدنيه يحسين
أحتار من يا باب أجيلك و أدخل إمنين
بالروح ساكن بالنواظر ما أعرف وين
يا ضوه النواظر... منجم الضماير
إنت لليحبون ... قائد المشاعر
توصل صده ... لأبعد مده ... حبك نده قطرته

******

آنا إبضريحك للشمس قلت إلها غيبي
بفراقك آنا إمن الحزن ماخذ نصيبي
من لطم صدري و الدموع و من نحيبي
دم راسي يشرح حالتي إبفرقة حبيبي
فرقتك سويه... عندي و المنيه
من عفت نحس بيك ... تلتفت عليه
أنطر ترد... لا تبتعد... دربك ورد نثرته

******

إتذكرت إنت إبكربله دمع نحرك إيسيل
و إتهون طبرة هامتي و دق الزناجيل
من ثقل دمعات الأرض بالعاشر إتميل
جيل إيتوارث هالشعائر من بعد جيل
و بحبر دمائي... وقعت إبائي
بالمواكب إوياك ... جددت ولائي
حبك طبع... ما ينمنع... يهوه الدمع عشرته

******

الشامت إمن أبجي عليك إيصد عليه
من ألطم إيحس بالذعر من هاي إيديه
و إيخاف مني لمن ألعن آل أميه
رهبتك ظلت بيهم إمن الغاضريه
ألطم و أعاند... ما يهمني واحد
و بطريقي وياك... باقي و الله شاهد
اليعترض ... خل يعترض... هذا الرفض علنته

تعليقات

لإرسال تعليق یجب أن تسجل في الموقع

مقاطع فيديو

more_horiz

مقالات المرتبطة

آخر الصوتيات المضافة

آخر المرئيات المضافة

  • 2.00x
  • 1.50x
  • 1.00x
  • 0.75x