القصيدة : من دون حبك
️للشاعر : انيس الخفاجي الكربلائي
الرادود : الحاج ملا باسم الكربلائي
المناسبة : الليالي الفاطمية 1440
طور : ميمر _ كربلائي
هيئة خدمة علي الأكبر - كربلاء المقدسة
من دون حبك يحسين ما تسوه كل دنيانه
******
من الطفولة خدمتك لازَمنه
وحبك تره من الخطأ لازمنه
صبح ومسه نشكر إلك لازمنه
وجه وگفه انبوس الأيد نخدم جبتنه اهنانه
******
ننسه الخدامة هالطبع مو عدنه
عدناهه بس انت الـنحب مو عدنه
بمجلس عزائك عالوقت موعدنه
موعدنه نفس التوقيت وكت اللطم تلگانه
******
مجربة محبتك سيدي شاره الهه
بروحي وحياتي خدمتك شاري الهه
ولمّــحَبّتك حته النبي شار الهه
منه انه ومني حسين ولمهجتي الريحانه
******
شكراً يبو اليمه شكثر منطينه
مهما ابعدت طي الارض من طينه
ربنه خلق كل البشر من طينه
الا احنه من دون الناس من طينتك سوانه
******
ميصير أعز من خدمتك شي عدنه
عندك ملايين الخدم شيعدنه
الشيعي لاصلي نسأله شيعي ادنه
كل شيعي مخلص يحسين تريده ونريده اويانه
******
خطوة بطريقك لا ابد مرجعنه
وشما نغرّب هم إلك مرجعنه
يابو الشعائر انت بس مرجعنه
من ايدك لايدك هاي نحسك ابو وترعانه
******
بيت .. الخدامة والخَدَم واجهته
ووجهة طريقك كل محب واجهته
لاجلك يبو اليمه الصعب واجهته
شمرة اخوك العباس بالخدمة ماخذ انه
******
نرخص يبو الاكبر إلك ناظرنه
بهاي الخدامة المنتظر ناظرنه
ورضوان باچر بالورد ناضرنه
عنوان خادم لحسين جنة عدن عنوانه
play_arrow
play_arrow
play_arrow
play_arrow
play_arrow
play_arrow
تعليقات